Dili khyaal, India ke IT employees par

Photo by Arjun Suri Photography

Har insaan apne vichaar rakh sakta hai aur keh sakta hai jo veh kehna chahta hai. Abhi naya saal do hazaar pandrah aa gaya hai, aur iska praarambh main kuch katu satya likhkar kar raha hoon.

1. Paisa. Ninyaanve pratishat (99%) log IT Industry paiso ke liye aate hain. Jo 1% asli interest ke liye aate hain veh itne pareshaan ho jaate hain ki har raat yeh sochkar sote hain ki kya paap kiya tha maine jo aise logon ko sehna padh raha hai. Agar pareshaan hona hi tha to kuch aur kar leta. Lagbhag har vidyaarthi koi badi company ke saath kaam karna chahta hai, taaki uska naam ho, doston mein waah-waahi hai, aur safety ke liye adhik paisa mile. Yeh log free mein kaam karvaaye tab na jaane kitne unke saath lagenge. Par log judhte hi adhiktar top companies ke saath hain.
2. Adhiktar top companies. Inhone bedagark kar diya hai achchi neeyat waale logon ka. Banda yeh soch kar jaata hai ki top ki company hai, mujhe foreign bhejenge, aur meri life choti-moti company walo se achchi hogi jinke paas na hi utne salary package hain, na foreign bhejne ka chance hai, aur na hi chaar logon mein waah-waah hone ka chance hai. Mere lagbhag sabhi dost jo ki aisi stithi mein hain unka dheere-dheere bedagark ho raha hai.
3. Bedagark. Har insaan apni barbaadi khud hi karta hai. Aisi badi companies mein aakar adhiktar log depressed ho jaate hain, chehre se hasi-khushi kam ho jaati hai, aur veh apne bachpan ke sapno ko bhool jaate hain. Unko lagta hai ki startups mein na kaam karun kyunki unke fail hone ka risk hai, aur apni company bhi isiliye nahi kholte.
4. Apni company. Jo banda apni company kholta hai veh 40 logon ka kaam ikatthe karta hai, taaki veh sadak par na aa jaaye. Dikhne mein lagta hai ki kitna bada kaam kiya, itne logon ko employment di. Magar padhti usko jootiyaan hi hain, adhiktar employees use shaq ki nigah se dekhte hain ki iske paas morals nahi hain, yeh nahi dekhte ki veh bhi ek insaan hai jiske paas emotions hain.
5. Emotions. Banda apne sukh-dukh publicly zaahir kare to samasya, na kare to aur badi samasya. Agar samasya honi hi hai to kar hi le zaahir. Jitni badi company utni badi ego.
6. Ego. Mere jitne bhi Bhaartiya dost vidheshi companies mein hain sabhi darte hain apni awaaz uthaane se. Aisa darr bana hua hai unke mann mein, ki beta tu apni zubaan khol ke dekh, tera main Jalianwala Bagh kar dunga, aur dhakke maar ke aisa nikalunga ki kahin aur tu naukri karne ke kaabil nahi rahega.
7. Naukri. Kuch vishesh insaan apni naukri mein kamiyaa aise dekhte hain, jaise ki us mein kamiyo ki maatra shoonya (0) hai. Agar kuch sudhaar sakte ho to karo, aise choti choti baaton ka batangadh na banao.
8. Baat ka batangadh. Bahut se logon ko lagta hai ki main sahi hoon magar mera maalik ek number ka adhiyal tattu hai. Yeh bhool jaate hain ki unka khajaanchi parvardigaar bhi ek insaan hai.
9. Insaan. Insaan ek hi baar paida hota hai. Usko apni company banaane ka mauka, choti company ke saath kaam karne ka mauka, sudharne ka mauka, dusro ko khush karne ka mauka, ankahi baatein kehne ka mauka, apne sapno ko poora karne ka mauka - tabhi milta hai jab tak veh jeevit rehta hai.
10. Jeevit. Har insaan tabhi jeevit reh sakta hai jab tak uske paas paisa ho.
11. Paisa. Yeh kramaank 11 nahi, kramaank 1 hai. Lagta hai ki yeh cycle aise hi chalta rahega chalta rahega chalta rahega…… <3

(Yeh post maine Ek Janvari Do Hazaar Pandrah (1-Jan-2015) raat ke baarah (12) se lekar agle adhtees (38) minute tak likhi thi).